No BOE de data 26 de xullo do 2021 publicouse unha corrección de erros da resolución do 12 de xullo da Dirección do Instituto de Saúde Carlos III, da que o seu extracto foi publicado no BOE, do 15 de xullo do 2021, na que se aprobaba a convocatoria para o ano 2021 de concesión de subvencións para axudas de Proxectos de Investigación de Medicina Personalizada de Precisión da Acción Estratéxica en Saúde 2017-2020, con cargo aos fondos europeos do Plan de Recuperación, Transformación e Resiliencia. O texto completo pódese consultar na Base de datos Nacional de Subvencións co identificador BDNS: 574666 (clic
AQUI)
A Medicina Personalizada de Precisión implica unha transformación na forma na que se toman decisións na práctica clínica e nas medidas de saúde pública, e persegue unha medicina máis segura, máis eficiente , preventiva e preditiva, baseada na utilización de datos masivos e adaptada ás características individuais que afectan á saúde; así mesmo, a antedita medicina recoñece a necesidade de xerar información xenómica e molecular para mellorar a comprensión das enfermidades.
O obxecto desta resolución é a concesión de subvencións para fomentar o avance progresivo da Medicina Personalizada de Precisión mediante o financiamento de proxectos que posibiliten o desenvolvemento e implementación no SNS de actuacións clínico-asistenciais que permitan incrementar a precisión en persoas e servizos de saúde dos diferentes procedementos de prevención, diagnóstico, tratamento e rehabilitación dispoñibles.
Poderán ser beneficiarios das axudas as seguintes persoas xurídicas, sempre que realicen ou xestionen actividades I+D+i en Biomedicina ou en Ciencias e Tecnoloxía da Saúde:
- Institutos de investigación sanitaria acreditados por orde ministerial.
- Entidades e institucións sanitarias públicas con actividade clínico-asistencial ou sen ela.
- Entidades e institucións sanitarias privadas sen ánimo de lucro.
- Organismos públicos de investigación definidos no artigo 47 da Lei 14/2001, do 1 de xuño, da Ciencia, a Tecnoloxía e a Innovación.
Universidades públicas, os institutos universitarios e as universidades privadas con capacidade e actividade demostrada en I+D, de acordo co previsto na Lei orgánica 6/2001, do 21 de decembro, de universidades.
- Outros centros públicos de I+D, diferentes dos sinalados no punto cuarto, vinculados ou dependentes da Administración xeral do Estado ou do resto das administracións públicas e os seus organismos, calquera que sexa a súa forma xurídica.
- Entidades públicas ou privadas sen ánimo de lucro que realicen ou xestionen actividades I+D, xeren coñecemento científico ou tecnolóxico ou faciliten a súa aplicación e transferencia.
A contía total máxima desta convocatoria é de 29.500.000 €.
O prazo de presentación de solicitudes é do 20 de xullo ata as 15:00 h do 9 de setembro de 2021.
No lateral dereito dispoñedes dun acceso á resolución.